La editorial Universos presentó estos díes la so primer publicación en llingua asturiana. Trátase d’un poemariu tituáu ‘Los venticinco pasos’ del xoven escritor Rubén Suárez Sánchez (1983), más conocíu como Rubén d’Areñes. Ye un garapiellu de poemes que marquen el camín andáu pol mesmu autor dende guah.e y hasta’l presente. Declárase «vagu confesu», pero yá tien llograos premios en dellos concursos. Asina, foi ganador del certame de poesía n’asturianu Nené Losada Rico que convoca l’asociación de muyeres Valdés Siglo XXI y que fai homenaxe a la decana de les lletres asturianes. Tamién se llevó’l premiu nos certámenes de poesía Elvira Castañón y Alfonso Camín, asina como’l Horreo de Carbayedo de microrrellatu. Dalgunes publicaciones asturianes como ‘Lletres asturianes’ o ‘Formientu’ amosaron el so trabayu nestos últimos años..

 

-¿Cómo definiría esti primer trabayu espublizáu, ‘Los venticinco pasos’?

-Los 25 pasos son los que dibuxen el camín que partió del neñu que fui, y que me lleva a min mesmu. Yo diría que vien a ser un llibru de consecuencies.

 

-Teniendo en cuenta que ye’l so primer contautu col mercáu y la maquinaria editorial, ¿ta contentu col resultáu?

-Sí, nun puedo dicir otra cosa. Nun tengo más qu’agradecimientos pa la Editorial Universos, que tienen bona parte de la culpa de que saliere a la cai. Ellos entendieron que yera hora de desvirgar.

 

-Ye normal que los autores qu’entamen y que traten d’espublizar les sos obres se quexen de la dificultá d’allegase al mercáu…

-Pa min foi too percenciello, la editorial punxo munchu enfotu en llibru. De nun ser por ellos, esti proyeutu de xuru quedara reducíu a dellos folios mal impresos podreciendo nun caxón.

 

-¿Qué opina de la crítica, fai munchu casu della?

-Faigo casu hasta ciertu puntu. Ye normal que se produzcan porque editar ye enseñar lo tuyo a los demás y la opinión pesa. Pero tampoco toi teniendo gran cosa en cuantes a crítica, va mui poco que salió’l llibru.

 

-¿Por qué escribe poesía preferentemente?

-Nun lo sé. Digo yo que tien de ser porque soi un vagu confesu y la poesía déxame sintetizar en bien poco, idees que me siguen. Voi dexalo en porque soi un vagu.

 

-¿Cómo ve la calidá de la poesía que se fai en llingua asturiana?

-Tenemos dao un pasu perimportante: anguaño podemos dicir que tenemos referentes de calidá n’asturianu dientro de la lliteratura. Otra miente empieza a tener relevancia dientro del panorama estatal. Esto ye dicir muncho yá.

 

El futuru

-¿La llingua asturiana ta sufriendo estos díes dellos ataques? ¿Ve’l so futuru con optimismu?

-Ye una situación que nunca sé si da más rabia o vergoña. El que busca l’enfrentamientu continuu, el conflictu, les dobles llectures,. tien dalgún problema mental seriu. Ye ridículu, daquién va tener que dar la cara énte la historia.

 

-Paez qu’ensin oficialidá’l panorama pue ser mui negru.

-Sedría como tener un fíu y nega-y la escolarización porque pensamos fonderamente que ye menos que los demás, avergonzanos d’él. N’Asturies nun somos otro que pueblerinos avergonzaos antroxaos de xente ‘progre’.

 

-Usté tamién ganó dellos concursos en llingua asturiana y dalgunos importanes, supongo que tendrá una bona opinión sobre los mesmos.

-Los premios son complementos circunstanciales. Agradécense, axuden económica y prestixosamente, pero a la postre lo relevante ye que tú merques el llibru y te preste o nun te preste. Muévese nel ámbitu suxetivu, y asina tien que ser.

 

-¿Siéntese más cómodu faciendo poesía que narrativa? ¿tamién escribe novela o relatos?

-Sí, ensin duldes, soi vagu enforma pa la narrativa (nun sé si lo dixi.). La poesía ye muncho más agradecío, más inmediato. Ye tamién custión de capacidá personal. Nun engaño: soi incapaz de narrar, nun valgo.

 

-¿En qué trabaya agora? ¿Hai nuevos proyeutos?

-Siempres hai daqué, pa min la poesía ye un diálogu terapéuticu col papel: dame lo que nun puedo pidi-y a les persones. Tamién ye verdá que la vida real dexa bien poco acutao pa otro que nun sía trabayar pa vivir. Agora quiero esfrutar d’esti primer fíu, depués. yá veremos.

 

http://www.elcomerciodigital.com/gijon/20080722/cultura/anguano-podemos-dicir-tenemos-20080722.html