Xuan Santori (Uviéu, 1968) ta acabante publicar «La fábrica de lluz» (Universos), una obra onde sigue’l camín abiertu na so primer novela, «La heredá», y qu’esplora nos raigaños de la conciencia colectiva d’un pueblu que dalgunos creen ver esbarrumbar. L’escritor, amás, prepara un estudiu que va tratar cuestiones como’l papel de la lliteratura asturiana na sociedá.

 
«La fábrica de lluz» ye la so segunda incursión na narrativa, una incursión que sigue’l mesmu camín qu’empezara a andar en «La heredá»…

-Ye continuista en parte. Son unes obres de narrativa un poco peculiares, onde entren otros xéneros, dende ensayos a entrevistes. En realidá la narrativa ye’l marcu xeneral onde s’inxerten, pero pue falase d’esos dos llibros con munchísima flexibilidá…

 

La so obra abarca poesía, ensayu y narrativa, y parez qu’en caún d’esos tres xéneros busca dir iguando una obra homoxénea…

 -Hai una evolución clara dende «La heredá», un llibru onde sí quixi facer una obra de crecimientu, asemeyao al «Retratu del artista adolescente» de Joyce, onde la voz va evolucionando hasta convertise nun personaxe fundamental dientro la obra, pero tamién formando al final esa mesma obra un puntu de vista hacia’l mundu. En «La fábrica de lluz» nun ye Xuan Santori, o’l so «alter ego», el que va falando. Eso aparez namás delles veces. Otres veces no que quiero centrame ye na voz común de los asturianos. Igual que «La heredá» yeren referencies personales, agora tamos falando de referencies colectives. Esta evolución foi una idea fundamental del llibru. Nun se trataba de facer «La heredá II», sinón de dar una visión asturiana d’un colectivu. D’ehí que la voz del narrador apareza namás en dellos capítulos, mentes qu’otres veces son los propios personaxes los que van afilvanando’l rellatu.


Pero nin siquiera la so voz queda ausente nesos casos, porque siempre ta claro que, anque sía otru’l que tea contando la historia, esa historia va tar siempre estructurada a partir d’otra voz esterior, la d’usté, que lleva al rellatu per un camín o per otru…

-Sí. Hai que pensar que yo soi parte d’esi colectivu que ta falando ehí. Toes eses esperiencies tán escoyíes por una razón: porque tamién me fixeron a mi ser como soi.

 

PA LLEER LA ENTREVISTA COMPLETA, HAI QUE DIR A LA EDICIÓN IMPRESA DE LES NOTICIES

http://www.lesnoticies.com

http://www.lesnoticies.com/index.asp?cod=2443&idage=3359&te=3&vap=0&acc=hinfo