Original en el diario El Comercio, 14 de abril de 2009.

 

La editorial Universos tien una nueva propuesta lliteraria. Nesti casu trátase d’una publicación que tará colos llectores de forma periódica. La revista ‘Estandoriu’ preséntase estos díes nel Principáu, col enfotu de convertise nun vehículu «que lleve a la lliteratura hacia un sitiu o hacia munchos». Col oxetivu d’esplorar, de buscar y de dexar «falar a los suaños, y qu’esplique la lliteratura onde naz». Empobinando esti nuevu proyeutu lliterariu atopamos al escritor y filólogu, Pablo Rodríguez Medina (L’Entregu, 1978).

 

-¿Cómo surdió la idea d’asoleyar una publicación como ‘Estandoriu’?

-Dende Editorial Universos vimos qu’había una falta d’espublizar una revista lliteraria que tuviere la calidá como seña d’identidá -nel conteníu y nel continente- y que naguase por facer ver l’estáu y la variedá de la lliteratura asturiana, al empar qu’enancha’l calce llingüísticu con traducciones, recuperación de testos con poca fortuna editorial, reseñes, etc.

 

-¿Qué oxetivos tien la publicación a curtiu y mediu plazu?

-Naguamos porque la revista se convierta nun referente de tou tipu: lliterariu, primordialmente, de diseñu, pero tamién de normalización, profesionalización y dignificación del sector lliterariu asturianu. Que sirva de catalizador de la variedá estética, de les propuestes lliteraries y, lo más importante, que nun se circunscriba a nengún grupúsculu lliterariu.

 

-¿Hai dalgún criteriu especial a la hora d’escoyer los trabayos que s’espublicen?

-Principalmente, la calidá. Podemos enquivocanos y pidimos paciencia y respetu, pero si dalgo tenemos claro ye que nun vamos publicar tolo que nos manden. Preferimos a un escritor defraudáu puntualmente qu’a un llector defraudáu siempre. Depués, que les collaboraciones enriquezan el panorama lliterariu asturianu.

 

-¿Tán abiertos a recibir collaboraciones de nuevos autores?

-Tamos esperando por elles. La revista nun entiende de nomes, namás de collaboraciones con calidá. Que los nuevos autores collaboren ye una señal de diversidá y de que la lliteratura asturiana tien camín per detrás de nós. Sedría una noticia ilusionante que la xente mozo nos mandara collaboraciones con calidá.

 

-Nel editorial apunten qu’una revista lliteraria ye como un «mercáu de suaños»… ¿Por qué?

-Porque nella puedes atopar de too: pues comprar, vender, mirar, pasiar, entretenete, compartir… Un sitiu con baturizu y vida; con golores y sabores pa deleitase…

 

-¿Por qué escoyeron el formatu de llibru pa una revista?

-Creímos que yera bono que la revista pudiere coleicionase y guardase nuna balda, xunto colos demás llibros. Amás, el formatu llibru paez que-y da mayor solemnidá a les collaboraciones; un formatu de revista invita namás qu’a mirar los santos.

 

-¿Ónde se va distribuyir?

-Peles llibreríes que trabayen con llibros n’asturianu. N’Asturies ye bien complicao porque nun se xeneró un circuitu editorial con una demanda y les principales llibreríes van camín de volvese en multinacionales con distribuidores nacionales que ponen pocu o nengún procuru a los pensamientos, llingües y lliteratures que son perifériques.

 

-Nel so casu personal, ¿cómo encara’l llabor de tar al frente d’esti nuevu proyeutu?

-Ye una responsabilidá bien grande, más que nada pola ilusión que creemos en nosotros y na xente. Agora nun sólo tenemos que sacar los númberos en tiempu y en forma, sinón que sabemos que nun podemos baxar la calidá y que la xente, de dalguna de les maneres, ta esperando por ello. Yo creo que ye un proyectu necesariu pa la lliteratura asturiana, y espero poder tar a l’altor d’ello.